Carruurtu, gaar ahaan inta u dhexeysa qiyaas ahaan hal jir iyo shan jir, shayo ayay badi afkooda geliyaan. Taasi waa wax caadi ah in ay sameeyaan marka ay dunida baarayaan. Shayada yar yar qaarkood, sida fataatiirta iyo kuusha, waxay qiyaastoodu ku habboon tahay si ay ugu joogsadaan dariiqa hawada ee ilmaha oo uu markaa ku margado. Habka ugu fiican ee taas looga ilaaliyo waxa weeyaan adigoo hubiya in ilmahaagu uusan gaari karin oo uusan soo qaadan karin shayada yar yar ee kuwaas la mid ah.
Inta ugu badan adiga, ama qof kale, ayaa arki doona marka uu ilmahaagu liqo shayga uu ku margado. Hase yeeshee, sababo kale ayaa keeni kara qufacidda. Haddii ilmahaagu uu si kadis ah qufac u bilaabo, uusan bukin uuna badi isku dayo in uu shayo yar yar afkiisa geliyo, markaa waxaa suurogal badan in uu wax ku margaday.
Haddii ilmahaagu uusan suuxin oo uu soo jeedo laakiin uusan qufacayn ama uu qufaciisu waxba tarayn, dhabarka ka garaac. Haddii garaacidda dhabarku ay margashada ka joojin weydo, oo uu ilmahaagu weli soo jeedo oo uusan suuxin, rux xabadka sabiga hal sano ka yar ama rux caloosha carruurta hal sano ka weyn. Xataa haddii uu shaygu ka soo baxo, gargaar caafimaadeed u doon.